الزوبعة جاية خلوا بالكم يا جماعة

"الزوبعة جاية خلوا بالكم يا جماعة ..

كل واحد يتدارى فى حتة أمان و اللى بيته من صخر يستخبى جواه.. "

دي كانت الرسالة اللى عمالة تشتغل فى راديو البلد..

و احنا صاحبنا كان عنده بيت جميل اوي بيطل على البحر على طول ..

هوا و ماية و منظر جميل .. طبعا لما سمع الرسالة دي ، قال فى نفسه " ههههه فاكرني هصدق الكلام الفاضى ده ؟!

ده أي كلام عشان غيرانين من بيتي الجميل اللى بنيته على شاطئ البحر ..

عايزيني أروح هناك عند الصخر و الأرض المتعبة دي أبني بيت و أبقى زيهم ...

هههههه ده بُعدهم "

و صاحبنا ده كان عنده اخ أكبر منه .. كان عايش على الناحية التانية عند الصخور ،

أينعم بيته مش بيطل على منظر حلو لكن هو حاسس انه عايش فى أمان ، و لما سمع الرسالة دي فى الراديو .. خاف و قلق على اخوه الصغير و قاله : تعالى أقعد عندي .. بيتك مش متأسس صح على شاطئ البحر ..

انا خايف عليك يا اخويا من الزوبعة.. بيتك هيتهد و يقع ..

أنا بيتي مبني على الصخر و أساسه متين .. مش هيقع و هيحمينا..

لكن الاخ الصغير نشف دماغه و العند ملأ قلبه و رفض نصيحة اخوه الكبير ..

و فات يومين تلاته و اللى كُنا خايفين منه حصل ...

الزوبعة قامت .. مطر شديد و رياح قوية و فى لمح البصر البيت اتهد و وقع ...

لكن البيت المبني على الصخر فضل ثابت فى وش الريح و الزوبعة ..

و بعد ما الزوبعة انتهت.. حزن الاخ الصغير على بيته اللى اتهد و وقع و اقتنع انه كان لازم يبني بيته من البداية على الصخر ..

كان هيبقى قوي و مش هيتهدم او يتأثر بأي زوابع..

و ده اللى علمه لينا السيد المسيح لما قال لنا " فكل من يسمع أقوالي هذه يعمل بها ، أشبه برجل عاقل بنى بيته على الصخر " ( مت ٢٤:٧ )