وحدي أنا لكنني لست وحدي

" وحدي أنا لكنني لست وحدي ...

بقربي أنت فى عزلتي هذه ..

مخلصي دائمًا بقربي ...

فى لحظات الضيق يهبني الفرح ..

إني معه ، و هو معي ..

حتى هنا لا أستطيع أن أبقى وحدي بدونه .. "

الصلاة دي كانت روجينا بتصليها كل يوم الصبح و بالليل ...

كانت بترددها دايما و بتردد معاها كل اللى حفظته من آيات الكتاب المقدس و هي لسه طفلة صغيرة ..

كانت ده كل اللى فكراه من ريحة أمها و اختها و حياتها القديمة .

روجينا كانت من أسرة بسيطة ، عايشة فى كندا مع باباها و مامتها و ليها أخ و أخت أكبر منها .

و فى يوم من الايام العصيبة اللى كانت بتعيشها كندا بسبب الحرب بين الانجليز و الفرنسيين ، هاجم بيتهم مجموعة من الهنود اللى كانوا منحازين لصف الفرنسيين ، دخلوا بيتهم و قتلوا باباهم و اخدوا روجينا و اختها الكبيرة بربارة و كان عمرهم وقتها ٩ سنين و ١٠ سنين .

و كان الجنود الهنود دول سابيين أطفال كتير ، و فى الطريق سلموا روجينا لأرملة عجوز كانت قاسية جدا و كانت بتعامل روجينا بمنتهى الذل و العنف .

و روجينا كانت دايما قلبها و فكرها متعلق بكنيستها و صورتها مش بتفارق مخيلتها ابدا ، و كانت بتصلي بإيمان إنها ترجع لمامتها و أخوها و أختها، كان عندها إيمان و رجاء قويين جدا .

و بعد ما فات ١٠ سنين و روجينا بقى عندها ١٩ سنة ، أكتشف واحد من قادة الجيش الانجليزي معسكر الهنود و اللى كان قريب جدا من بيت الأرملة العجوز . و فعلا جهزوا خطة و إنقضوا على المعسكر و حرروا أكتر من ٤٠٠ شخص كانوا مأسورين عندهم.

وصل بيهم الظابط لمدينة Carlisle و انتشر خبر وصولهم بين الأمهات و جم على أمل انهم يلاقوا اولادهم اللى فقدوهم من ١٠ سنين فاتوا .

لكن الموضوع ما كانش بالسهولة دي ابدا ، الأولاد شكلهم اتغير و نسيوا لغتهم الأم.

كانت أم روجينا بتتمشى بين الامهات و الأولاد بتترجى تعرف بناتها روجينا و بربارة ، لكن بدون فايدة و الحزن بقى مالي كل قلبها و مش عارفة هتعمل ايه و بدأت تبكي ، شافها المسؤولين و بدأوا يحاولوا يهدوها و يساعدوها..

و سألها واحد من الظباط " فاكرة أي حاجة مميزة تقدري تعرفي بيها بنتك ؟ "

ردت الأم :" أيوة ، كان فيه ترنيمة انا و هما بنرمها دايما ، و بدأت الأم ترنم الترنيمة وسط الناس ، و فجأة لقت بنتين من وسط الجموع بيشاركوها نفس الترنيمة.

أرتمت الأم و الابنتين فى حضن بعض فى مشهد مؤثر .

إلتقوا تاني بالحب و روح الوحدة من خلال وعود الله الصادقة و الإيمان الحي الصادر من قلوبهم.

رجعت الأم و معاها بناتها المفقودين من ١٠ سنين و كانت بتردد فى قلبها كلمات بولس الرسول " و إنك منذ الطفولية تعرف الكتب المقدسة القادرة أن تحكمك للخلاص بالإيمان الذي فى المسيح يسوع " ( ٢تي ٣: ١٥ )