فى عيد الأم بنحتار نختار مين تكون أعظم و أجمل أم ..
و كتابنا المقدس بيحكيلنا و يورينا أمهات كتير ليهم فضل عظيم على أولادهم و عل كل البشرية ..
بنعرف ان كل الأمهات دي تعبت من أجل اولادها زي :
° حنة أم صموئيل
° حنة أم طوبيا
° أليصابات أم يوحنا
و برضه عندنا أمثلة كتير لأمهات مارسوا الأمومة لناس ما كانوش أولادهم...
تعالوا نعرف مين دول .
مريم اخت موسي
مريم كانت اخت موسى الكبيرة ، و كانوا عايشين فى ظروف صعبة جدا ، كان وقتها فرعون ملك مصر مشدد أنه لو إتولد صبي للعبرانيين يُقتل فورا .
مريم كانت بنت جميلة جدا .. بتساعد مامتها يوكابد فى انها تراعي اخواتها هارون و موسى و تخلي بالها عليهم خصوصا لما جه وقت ولادة موسى و باباهم عمرام اضطر انه يخبيه ٣ شهور بعيد عن عيون حرس فرعون، لكن بعد المدة دي بقى صعب يخبيه اكتر من كده و اضطروا هو و يوكابد امهم انهم يحطوه فى سبت مطلي بالحمر و الزفت و يسيبوه فى النيل.
لكن مريم بروح الأم الصغيرة اللى جواها فضلت واقفة تراقبه من بعيد و تشوف اخوها هيوصل لفين، و تصلي لربنا انه ينقذه، و كأن ربنا سمع صوتها و صلاتها.
لأن فى نفس الوقت ده كانت بنت فرعون نزلت تغتسل فى النهر و سمعت صوت موسى الرضيع بيعيط، فا أمرت خادمتها تشوف صاحب الصوت ده مين ، و اول ما شافته قلبها رق ليه و أخدته لإنها كانت عاقر و مش هتقدر تخلف أصلا.
مريم شافت اللى حصل و جريت عليها و قالتها: " ده من اولاد العبرانيين أكيد ، تحبي يا مولاتي أشوفلك مُرضعة ليه " .
إبنة فرعون وافقت على طول و فعلا جريت مريم بسرعة الريح تحكي لمامتها اللى حصل .
لولا أمومة مريم ناحية أخوها كان زمانه ميت فى النيل ، ربنا خلق جوه كل أنثى عاطفة الأمومة زي ما خلقها جوه قلب مريم اخت موسى و أبنة فرعون العاقر .
ليست هناك تعليقات:
إرسال تعليق