"شَاكِرِينَ كُلَّ حِينٍ عَلَى كُلِّ شَيْءٍ فِي اسْمِ رَبِّنَا يَسُوعَ الْمَسِيحِِ."
( أف20:5)
مرة من المرات
كنا متأخرين في الكنيسة بالليل، فعرضت على واحد صاحبي مش معاه عربية اني أوصله في طريقي فاعتذر قائلاً ( لا كتر خيرك انا هاخد اتوبيس يوصلني البيت، الوقت اتأخر وانا مش عايز أعطلك)
وبعد محاولات كتيرة معاه وافق اني أوصله..
وفي وسط الطريق قعدنا نتكلم وندردش مع بعض فسألته عن اخباره وأحواله والدنيا عنده في الشغل أخبارها ايه ( أنا كنت عارف ان مرتبه بسيط جدا، انا نفسي ماكنتش متخيل هو ازاي عايش بالمرتب ده هو ومراته وابنه اللي لسه مولود)
فرد عليا و قالي لا نشكر ربنا اوي اوي كله حلو .. ربنا ساترها علينا...
فقمت انا من جهلي قلت له معلش انشاء الله ربنا يدبر وتلاقي شغل احسن من اللي انت فيه والدنيا تبقى أحلى
رد وقال لي: صدقني هي كدة حلوة خالص نشكر ربنا. دي لو بقت احلى من كده كانت هاتبقى ماسخة!!!
كان هذا الانسان يتكلم بكل صدق القلب لا يتصنع الشكر والرضا ولاتشعر انه يقول اي كلام وخلاص بل كانت كل كلماته انما تدل وبقوة على عمل الله في حياته وترى ذلك في وجهه المبتسم باستمرار!
بعدها بكام يوم بالصدفة ماكنش معايا العربية فعرض علي واحد صاحبي انه يوصلني وانا طبعا ما صدقت
واحنا في الطريق بنتكلم وندردش برضه فبسأله السؤال التقليدي أخبارك ايه وأخبار الدنيا معاك ايه وملحقتش اخلص السؤال الا ولاقيته رد بسرعة كأنه كان محضّر الاجابة
زفت !!!
الواحد مش عارف يلاحق على ايه ولا ايه ايجار البيت ولا مدارس الاولاد ولا اللبس ولا المصاريف اللي مابتخلصش. الواحد بياخد مرتبه من هنا مابيعرفش يشيل منه حاجة ( مع اني أعرف برضه كويس انه شغال في مكان كويس وبيقبض كويس جداً!)
وكمّل عليَّ وقال لي: الواحد زهق من حياته ومش عارف ربنا هايسيبنا لحد امتى تعبانين كده!!!
كنّا خلاص تقريباً وصلنا تحت البيت فقلت له: ربنا معاك وميرسي تعبتك
حطيت المثالين قدام بعض.
واحد ماعندوش عربية وبيعمل كل تحركاته بالاتوبيس والمشوار اللي المفروض ياخد منه ١٠ دقايق لو معاه عربية ممكن ياخده في ساعة بالاتوبيس وبالرغم من كده بيوصل القداسات قبل اي حد معاه عربية - شغال في مكان ضعيف- مرتبه اي كلام - معرفش بيدبر اموره ازاي كل شهر بيشكر ربنا من كل قلبه وبيقول ده كده حلو أوي ومش طالب من ربنا اي حاجة تاني
وواحد تاني راكب عربية موديل سنة فاتت- شغال في شركة محترمة- بيقبض كويس وعايش هو وبيته عيشة كويسة بيقول زفت ولحد امتى ربنا هايسيبنا تعبانين كده
اتعلمت ان مش كتر الفلوس هو اللي يجيب الشكر ومش كتر الفلوس هو اللي يجيب السعادة. ياما ناس معاها فلوس مش عارفة تشكر وياما ناس معاها ملايين مش عارفة تفرح
الشكر والراحة بتيجي من قناعتك ان خطة ربنا في حياتك انك تعيش كده بالشكل ده وبالامكانيات دي.
اللي ماتعودتش يشكر ربنا وهو مش معاه مش هيعرف ابدا يشكره وهو معاه مال الدنيا كلها.
يقول احد الاباء القديسين ليست عطية بلا زيادة الا التي بلا شكر
( أف20:5)
مرة من المرات
كنا متأخرين في الكنيسة بالليل، فعرضت على واحد صاحبي مش معاه عربية اني أوصله في طريقي فاعتذر قائلاً ( لا كتر خيرك انا هاخد اتوبيس يوصلني البيت، الوقت اتأخر وانا مش عايز أعطلك)
وبعد محاولات كتيرة معاه وافق اني أوصله..
وفي وسط الطريق قعدنا نتكلم وندردش مع بعض فسألته عن اخباره وأحواله والدنيا عنده في الشغل أخبارها ايه ( أنا كنت عارف ان مرتبه بسيط جدا، انا نفسي ماكنتش متخيل هو ازاي عايش بالمرتب ده هو ومراته وابنه اللي لسه مولود)
فرد عليا و قالي لا نشكر ربنا اوي اوي كله حلو .. ربنا ساترها علينا...
فقمت انا من جهلي قلت له معلش انشاء الله ربنا يدبر وتلاقي شغل احسن من اللي انت فيه والدنيا تبقى أحلى
رد وقال لي: صدقني هي كدة حلوة خالص نشكر ربنا. دي لو بقت احلى من كده كانت هاتبقى ماسخة!!!
كان هذا الانسان يتكلم بكل صدق القلب لا يتصنع الشكر والرضا ولاتشعر انه يقول اي كلام وخلاص بل كانت كل كلماته انما تدل وبقوة على عمل الله في حياته وترى ذلك في وجهه المبتسم باستمرار!
بعدها بكام يوم بالصدفة ماكنش معايا العربية فعرض علي واحد صاحبي انه يوصلني وانا طبعا ما صدقت
واحنا في الطريق بنتكلم وندردش برضه فبسأله السؤال التقليدي أخبارك ايه وأخبار الدنيا معاك ايه وملحقتش اخلص السؤال الا ولاقيته رد بسرعة كأنه كان محضّر الاجابة
زفت !!!
الواحد مش عارف يلاحق على ايه ولا ايه ايجار البيت ولا مدارس الاولاد ولا اللبس ولا المصاريف اللي مابتخلصش. الواحد بياخد مرتبه من هنا مابيعرفش يشيل منه حاجة ( مع اني أعرف برضه كويس انه شغال في مكان كويس وبيقبض كويس جداً!)
وكمّل عليَّ وقال لي: الواحد زهق من حياته ومش عارف ربنا هايسيبنا لحد امتى تعبانين كده!!!
كنّا خلاص تقريباً وصلنا تحت البيت فقلت له: ربنا معاك وميرسي تعبتك
حطيت المثالين قدام بعض.
واحد ماعندوش عربية وبيعمل كل تحركاته بالاتوبيس والمشوار اللي المفروض ياخد منه ١٠ دقايق لو معاه عربية ممكن ياخده في ساعة بالاتوبيس وبالرغم من كده بيوصل القداسات قبل اي حد معاه عربية - شغال في مكان ضعيف- مرتبه اي كلام - معرفش بيدبر اموره ازاي كل شهر بيشكر ربنا من كل قلبه وبيقول ده كده حلو أوي ومش طالب من ربنا اي حاجة تاني
وواحد تاني راكب عربية موديل سنة فاتت- شغال في شركة محترمة- بيقبض كويس وعايش هو وبيته عيشة كويسة بيقول زفت ولحد امتى ربنا هايسيبنا تعبانين كده
اتعلمت ان مش كتر الفلوس هو اللي يجيب الشكر ومش كتر الفلوس هو اللي يجيب السعادة. ياما ناس معاها فلوس مش عارفة تشكر وياما ناس معاها ملايين مش عارفة تفرح
الشكر والراحة بتيجي من قناعتك ان خطة ربنا في حياتك انك تعيش كده بالشكل ده وبالامكانيات دي.
اللي ماتعودتش يشكر ربنا وهو مش معاه مش هيعرف ابدا يشكره وهو معاه مال الدنيا كلها.
يقول احد الاباء القديسين ليست عطية بلا زيادة الا التي بلا شكر
ليست هناك تعليقات:
إرسال تعليق